5.12.10

Mirabilia numeri CIV (vel CIIII)

Die Veneris III huius mensis Decembris Sanremo, oppidum sinus Ligustici, ubi annua habetur cantus Italici satis nota exhibitio, pigritiae raedam gubernandi causa, ferrivia petivi. 

Molliter sedens, aequora interretialia navigare coepi et cito nuntium mihi laetum comperii: eos, qui me sequuntur in Twitter, qui paucos ante dies modo C, tum CIV numerum explevisse.

Interea consessor meus acta diurna evolvebat, quorum in quadam pagina hunc novum singularemque titulum animadverti: «'Accurrite! Vicinum meum necant'. Custos publicus mulieri non credit. Cadaver invenitur post CIV dies». 

Cum ad deversorium Alexandro dicatum tandem perveni, ubi conclave (ultimum quidem liberum!) telephonice reservaveram, valde obstupui quod numero CIV signabatur.

Estne inter vos, candidi lectores, novus Pitagoras, qui mundum numeris regi adfirmavit, aut novus Carolus Jung, subtilis syncronismi investigator, qui sensum (si aliquis sit sensus huiusmodi rebus) mihi aperiant triplicis illius occursus eidem numero, eodem die eodemque itinere?
Cassandrae autem rogantur ut divinationibus suis benigne abstineant.

 clavis conclavis

nuntius Tabellarii Vespertini
vide etiam: 

5 comments:

  1. Quippe quae dei iussu non umquam credita Teucris fuissem, fatis claudam futuris ora, sed noli dubitare quin reponsum omnibus dare semper sCIVerim atque etiam tibi, qui CIVilia omina CIVisti die IIIº mensis duodecimi, scilicet XII, quae litterae quoque faciunt, sicut CIV, numerum imparem, quo "deus gaudet".
    Cassandra misera dixit.

    ReplyDelete
  2. "Avercene di Cassandre così!" his in casibus dicere solemus nos Itali, quod interpretatur: utinam permultas habuissemus Cassandras tam callidas et iucundas! Gratias ineffabiles tibi ago.

    ReplyDelete
  3. Nec in Cabbala numeri CIV significationem invenies. Sed post historiolam quam nobis narravisti, tantum dicere restat: "cave, scriba noster, numerum hunc". hahaha.

    ReplyDelete
  4. Quidnam times, pavide scriba? Omne trinum est perfectum. Et perfectum est bonum. Porro dies in quo triplex occursus evenit, numero III magnopere signatur. Est enim III tum hodierna cum antiqua tempus computandi ratione (a.d. III Nonas Decembres), quod raro accidit. Cum autem numerus te sequentium, et numerus dierum obliti cadaveris et numerus clavis conclavis sint IV (post C), te habeas terque quaterque beatum!

    ReplyDelete
  5. Nihil ego timeo, sed alia causa: mater mea (nimios ante annos) die ipso Veneris me genuit. Veneris ergo in alma tutela sum: quid timeam? Aeneadum genetrix, sine qua "quicquam dias in luminis oras / exoritur, neque fit laetum neque amabile quicquam", malum meum non patietur... suis saltem diebus!

    ReplyDelete

Desiderius Erasmus

Desiderius Erasmus
With Latin, a horse, and money, thou wilt pass through the world.
Con latín, rocín y florín andarás el mundo.
Latine sciens, equo vectus, satis nummatus, totum orbem peragrabis.